20 ka mga balay ang ginlamon sang kalayo sa sunog nga nagluntad sa Purok Magti-ayon, Barangay 10, ciudad sang Bacolod alas-12:12 kaina sang kaagahon.
Ang lugar ang malapit lang sa Bacolod City Fire Station apang bangud ikit-ikit ang mga pamalay, tuman lang kadasig ang paglaton sang kalayo.
Suno sa Bacolod City Fire Station, 14 ka mga balay ang totally-burned samtang anom naman ang partially-burned.
20 ka mga pamilya ukon 59 ka mga indibidwal ang apektado sang sunog.
Suno sa pila ka pumuluyo, namurag-muragan ang mga ini sa ila mahamuok nga katulugon bangud kaagahon.
Nadeklarar nga fire out na ang sunog alas-12:57 sang kaagahon.
Sa karon, ang mga residente ang nagatinir sa multi-purpose hall sang Barangay 10 samtang ang iban sa ila ang nagatinir sa ila nga himata.
Ginaimbestigaran pa sang Bacolod City Fire Station kun ano ang ginhalinan sang kalayo.
