BACOLOD CITY — Magasugod na sa Mayo 11 ang satellite training course nga patigayunon sang Bureau of Fire Protection diri sa ciudad sang Bacolod.
Suno kay Fire Senior Supt. Fred Trajeras, acting regional director sang BFP Negros Island Region, 200 ka mga fire officers 1 ang magasabak sa amo nga paghanas kun sa diin 83 diri ang nagikan sa NIR samtang ang nabilin naman ang magahalin sa Cebu kag Western Visayas.
Ginpaathag ni Trajeras nga ini ang labing una nga kahigayunan nga nagpasugot ang BFP national headquarters nga magbutang sang satellite training ground magluwas sa National Training Center sa Laguna.
Halin pa sang nagligad nga tuig ang pangaluyag ni Trajeras nga patigayunon ini sa Bacolod bangud kun maghulat ang mga FO1 sa bakante nga slots sa NTC, tinuig pa ang dapat nga hulaton antes sila maka-training bangud sa kadamuon sang naga-istambay kag 600 lamang ang total capacity sini.
Nahibaluan nga pagkatapos sang oath-taking, kinahanglan sang mga bag-o nga recruit nga magpaidalom sa Fire Basic Recruit Course agud nga mangin permanente nga FO1.
Bangud may yara man sang pasilidad sa Panaad Park and Stadium, nakumbinsi ang mga opisyal sang BFP sa hinyo ni Trajeras, sa bulig man ni DILG Undersecretary for Public Safety Jesus Hinlo.
Sa tion nga magsugod na ang training, magabisita man diri si Fire Chief Director Bobby Baruelo.
Ang paghanas ang magatakop sa Setyembre 11.
