Opisyal na nga nagbukas ang 2026 National Private Schools Athletic Association Meet (PRISAA 2026) kahapon.
Ginpatigayon ang opening ceremony sa Panaad Park and Stadium nga gintambongan sang kapin 15,000 ka delegates.
Yara kahapon sanday Department of the Interior and Local Government (DILG) Secretary Jonvic Remulla, Negros Occidental Governor Eugenio Jose ‘Bong’ Lacson, Negros Occidental’s 3rd district representative Javier Miguel Benitez, Bacolod City Mayor Greg Gasataya kag Zamboanga City Mayor Khymer Adan Olaso nga nagtambong para makita ang paghost sang Bacolod City, bangod ang ciudad sang Zamboanga ang masunod nga magahost sang PRISAA 2027.
Suno kay Dr. Ryan Mark Molina, presidente sang National kag NIR PRISAA, nagpasalamat ini kay governor Lacson sa pagbulig sa pag-organisar sang dako nga event, kay mayor Gasataya sa pagtipon sang linibo ka bisita sa ciudad kag probinsya, kag sa national PRISAA board sa paghatag sang oportunidad sa paghost sang PRISAA 2026.
Suno diri, indi mahapos ang ini nga obligasyon apang tanan nagbuligay para sa madinalag-on nga opening ceremony.
Mensahe sini sa mga batang PRISAA nga i-enjoy ang tanan nga challenges kag triumph sa competition.
