22 ka balay ang totally damaged sa nagluntad nga sunog sa Brgy Zone 4, Cadiz City kahapon sang aga.
Sa interview sang Bombo Radyo Bacolod kay Fire Officer 2 April Shayne Ausan, Chief Investigator sang Bureau of Fire Protection – Cadiz City, 16 ka balay ang nahalitan gikan sa Prk Hitalon B, samtang anom ka balay naman ang nasunog sa Prk Malipayon, kun sa diin nagdangat sa 31 ka pamilya ang apektado.
Sa ila imbestigasyon, ang kalayo ang gina-alegar naghalin sa balay ni Rosario Delina sa Prk Hitalon B.
Siya ang may-ara sang mga boarders, kag ginapahayag naman nga ang kalayo ang nag-umpisa sa kwarto ni Eddie Cortez, isa ka retired teacher, nga sa karun nagaluto kag nagabaligya sang sud-an.
Nagdangat naman sa kapin 700 square meters ang area nga ginlamon sang kalayo, kag padayun pa nga ginatumod ang balor sang kahalitan.
Duha sa karun ang ginalantaw nga anggulo sang BFP sa insidente.
Isa amo ang posibilidad nga nabiyaan nga niluto ang nagtuga sang sunog, ukon mahimo man nga naghampang sang kalayo ang utod nga babayi ni Cortez, nga ginapahayag may deperensya sa paminsaron.
Suno kay Ausan, narespondihan man gilayon ang sunog, apang madasig nga naglapta ang kalayo bangod kalabanan mga light materials ang balay sa nasambit nga swam area.
Iban sa mga biktima ang temporaryo nga nagpuyo sa kalapit nga himata, samtang ang iban ang yara naman sa covered court sang Brgy Zone 4.
Una naman nga nagtanyag si Cadiz City Mayor Salvador “Bading” Escalante sang 80 square meters nga duta sa Brgy Daga kag P50,000 nga cash assistance agud nga makasaylo ang mga pumuluyo, bangod indi na sini luyag nga magbalik pa ang mga biktima sa makabig nga hazardous area.
Ini bangod sa tion nga magtaob, nagalab-ot ang tubig sa dagat sa mga pamalay.
