BACOLOD CITY – Yara na sa maayo nga kahimtangan ang 22 ka mga pasahero sang isa ka bus nga natumba matapos ini makabunggo sa naga-sungayay nga karbaw sa ciudad sang Bago kagab-i.
Sa exclusive interview sang Bombo Radyo Bacolod, ginpahayag ni Police Senior Inspector Hercules Trigue, deputy chief of police sang Bago City Police Station, nga padulong sa Barangay Ma-ao, Bago City ang Roadstar bus nga may yara sang ruta nga Ma-ao Bacolod vice versa, sang natabo ang aksidente sa Barangay Pacol, alas-7:00 kagab-i.
Natiempuhan nga yara sa tunga sang dalan ang duha ka karbaw nga nagasungayay kag hinali lang ini nabungguan sang bus.
Bangud sa kabaskugon sang pagkabunggo, natumba ang bus sa plantasyon sang tubo sa pihak nga bahin sang dalan.
Wala pa mahibaluan kun pila ang kabug-usan nga pasahero sang bus apang 22 sa mga ini ang gindala sa Bago City Hospital bangud sa minor injuries apang out-patient naman ang pila sa ila.
Nakabatyag naman sang trauma ang pila ka mga pasahero apang yara sa maayo nga kahimtangan.
Suno sa pulis, wala nakita sang driver ang duha ka mga karbaw bangud itom man ang duag sang mga ini kag madulum ang dalan.
Kasunod sang natabo nga insidente, lunsay napatay ang duha ka karbaw.
