Patay ang 26-anyos nga lalaki matapos ginluthang sa atubang sang Negros Occidental High School (NOHS) sa Araneta Street, Barangay 36, Bacolod City, pasado alas 8:00 kagab-i.
Sa interview sang Bombo Radyo kay Police Captain Ramil Sarona, station commander sang Bacolod Police Station 1, ginkilala ang biktima kay Jason Romo, 26-anyos residente sang Purok Malipayon, Barangay 35, Bacolod City.
Suno sa mga vendors sa atubang sang NOHS, isa ka lupok ang ila nabatian kag nakit-an na lamang sang mga ini nga duguon kag nagahamyangon ang biktima sa tupad sang tricycle nga iya ginapanag-iyahan.
Si Jason Romo ang nagapungko sa nakapark sini sang tricycle bangud iya ginahulat ang iya nobya nga estudyante sa NOHS sang hinali lamang ini nga ginpalapitan sang suspetsado nga nagasakay sa motorsiklo nga wala sang plate number kag ginluthang sa ulo.
Gilayon naman nga nagpalagyo sa sur nga bahin sang dalan Araneta ang wala pa makilal-an nga suspetsado nga nagasuksok sang jacket kag helmet nga itom.
Gindala ang biktima sa Corazon Locsin Montelibano Memorial Regional Hospital (CLMMRH) apang gindeklarar nga dead on arrival.
Isa ka baseho sang wala pa mahibaluan nga sahi sang armas luthang ang nakuha sang mga kapulisan sa crime scene.
Sa karun suno kay Sarona, gina-imbestigahan pa kun may kaangtanan sa illegal nga druga ang biktima apang wala ini nalakip sa ila drugs watchlist.
Nahibaluan nga si Jason ang magulang ni Shemen Romo, 19-anyos, isa sa mga gin-abduct samtang nagapamunit sa Barangay 35, Bacolod City sang Agosto 2, pasado alas 10 sang gab-i.
Kaupod sini nga ginkuha sang wala pa makilal-an nga mga suspetsado si Joneil Villalon, 45-anyos, lunsay mga residente sang nasambit nga barangay.
Santo sa pahayag sang pamilya, nagapamunit ang duha sang hinali lamang ang mga ini nga ginpalapitan sang apat ka mga lalaki kag nag-upod lamang ang mga ini.
Tubtob sa karun, wala pa nakabalik ang duha.
