Nahibaloan nga residente sang Guimbal, Iloilo ang suldado nga napatay sa engkwentro nga nagluntad sa tunga sang 79th Infantry Battalion sang Philippine Army kag Northern Negros Front sang New People’s Army sa barangay Tamlang, Escalante City, Negros Occidental, kahapon.
Sa impormasyon nga nakuha sang Bombo News Team, ang napatay nga suldado ginkilala nga si Private First-Class Jhon Rey Brasil, naga-edad sang 29 nga residente sang banwa sang Guimbal kag madugay na nga na-assign sa Negros.
May asawa si Brasil nga naga-edad sang ginabanta 26 nga residente sang Barangay Pandanon, Murcia.
Nag-agom sang igo sa ulo si Brasil nga ginhingagaw pa dala sa ospital apang wala na natabangan.
Ang bangkay sini yara sa FDN memorial chapel sa ciudad sang Sagay kag plano sang pamilya nga ihaya ini sa Guimbal.
Nagpadulong ang pamilya ni Brasil kaina sa punerarya kun sa diin ang maninoy sa kasal sang suldado ang nag-assist sa pamilya sa pagbyahe.
Yara didto ang asawa ni Brasil kag ang magulang sini nga babayi nga nagpangayo nga hatagan sila sang privacy.
