Patay ang isa ka 26 anyos nga lalaki matapos ginluthang sang iya nga gingarit-garit sa isa ka birthday party sa Barangay Hilub-ang sa banwa sang Calatrava.
Sa interview sang Bombo Radyo Bacolod kay Police Major Ronald Santillan, hepe sa Calatrava Municipal Police Station, ang biktima ang ginkilala nga si Junnifer Pancho, 26 anyos, single, laborer samtang ang suspetsado ang ginkilala naman nga si Ronjel Ugdiman, 28 anyos, kasado, laborer; lunsay mga residente sa nasambitan nga lugar.
Suno sa hepe, ang biktima kag suspetsado ang magkaupod nga naga-inom sang makahulubog nga ilimnon sa birthday party sang Huwebes Santo.
Apang kapin alas-12:05 sang kaagahon, Biyernes Santo, hungod nga gingarit-garit ni Pancho ang suspetsado.
Agud indi maglala ang away, sila ang gintambagan naman sang Barangay Kagawad nga yara man sa nasambitan nga selebrasyon, kun sa diin ginpapauli na lamang si Ugdiman.
Apang wala nakuntento si Pancho kag ginsundan pa sini ang suspetsado, kag didto na naghunos sang gina-alegar cal. 38 revolver si Ugdiman kag ginluthang sang duha ka beses si Pancho.
Gintinguhaan pa nga madala sa Calatrva District Hospital ang biktima, apang ini ang gindeklarar nga dead on arrival.
Sa resulta sang post mortem examination, ang biktima ang nag-angkon sang igo sang bala sa dughan kag liog.
Boluntaryo naman nga nagsungka ang suspetsado sa bulig sang Barangay Kagawad.
Apang wala ini sang may nasurrender nga armas-luthang, bangod suno kay Ugdiman ini ang nahulog sang siya ang magpalagyo matapos ang pagpangluthang.
