Nagdangat sa 26 ka babaye nga estudyante sang St. Francis Assisi High School sa Vallehermoso, Negros Oriental ang naglalain ang pamatyag matapos nakahaklo sang ginapatihan sungaw sang septic tank sa ila eskwelahan kahapon.
Gilayon nga gindala sa Vallehermoso Municipal Health Center kag sa isa ka hospital sa San Carlos ang mga estudyante nga nagbatyag sang sakit sang ulo, palanuka kag pagkalipong.
Sa interview sang Bombo Radyo Bacolod kay Dr. Debito Gonzaga, ang doktor nga nag-atinder sa mga estudyante sa Vallehermoso Municipal Health Center, nahisayran nga may nahaklo lamang nga baho kag nakita nga aso ang mga estudyante kag diri na nagsugod nga hysterical ang mga ini rason nga naglalain ang ila pamatyag.
Suno kay Dr. Gonzaga, magluwas sa sungaw sang septic tank may yara man sang nagsunog sang mga dahon sa eskwelahan.
Gin-athag man ni Dr. Gonzaga nga indi haze gikan sa forest fires sa Indonesia ang gintunaan sang paglain sang pamatyag sang mga estudyante.
Suno diri, wala pa nakalab-ot sa Vallehermoso ang haze.
Madumduman nga una na naguwa ang report kahapon nga haze ang rason sang paglain sang pamatyag sang mga estudyante.
