Nagapanawagan sang hustisya ang pamilya sang 29 anyos nga lalaki nga tumandok sang banwa sang EB Magalona, Negros Occidental nga napatay sa Jeddah City, Saudi Arabia.
Sa interview sang Bombo Radyo kay Evangeline Javelosa, 10 ka tuig na ini nga nagatrabaho sa Riyadh, Saudi Arabia kag sang Abril 27, 2025 nag-apas ang iya bata nga si James Melvic Javelosa para magtrabaho man didto para suportahan ang iya pamilya sa karun nga nagabusong pa ang iya asawa.
Suno diri, nagpadulong si James sa accommodation center nga ginhatag sang Placewell agency ukon Tamkeen agency apang wala naghatag sang food allowance ang ahensya.
Nagdesisyon si Evangeline nga dal-an sang pagkaon ang iya bata kag ang iban sini nga kaupod bangod wala sila sang makaon samtang nagatraining.
Matapos ang duha ka semana nga training sang Mayo 11 nagpadulong na sa Jeddah City si James kaupod ang iban pa nga Pilipino kun sa diin iban diri ang Negrense man.
Kapin sa 10 ka oras ang ila byahe kag nagpahibalo na si James nga nagalain ang iya pamatyag.
Pagkasunod nga adlaw, Mayo 12 nag-umpisa sa pagtrabaho si James kag nanugid ini nga makaduha ka beses na siya nga nagsuka kag naggwa sang timprano sa duty sini agud magpauli na.
Amo yadto ang ulihi nga komunikasyon ni James kay Evangeline.
Mayo 13, nahibaluan ni Evangeline sa mga roommates ni James nga may duha ka lalaki nga staff sang ahensya nga nagkuha sa iya bata pasado alas- 9:30 sang gab-i agud dal-on sa ospital bangod nagalain ang iya pamatyag.
Mayo 14, kapin alas- 8:00 sang gab-i nakit-an si James sang iya mga abyan nga unconscious nga yara sa dalan malapit sa ila ginatiniran.
Gindala nila ini sa ospital kag sang nagpadulong si Evangeline sa ospital naabtan sini si James sa ICU nga nacomatose.
Mayo 17, gindeklarar nga patay na si James.
Nakig-angot si Evangeline sa kapulisan sang Jeddah para maimbestigaran ang kamatayon sang iya bata.
Nag-ayo man ini nga makita ang CCTV footage kun sa diin nasapwan si James apang ang video ang ginpakita lang sa ahensya kag wala na sa iya.
Naghambal pa ang ahensya nga may video kag prictures nga nagapakita nga nagagamit sang illegal nga druga si James kag natural death ang ginkamatay sini apang wala nagapati diri ang iya pamilya bangod madamo ini sang pilas kag lagob sa lawas.
Nag-abot kapin alas- 5:30 kaina sang aga ang bangkay ni James sa Bacolod-Silay airport kag indi makarequest sang autopsy result ang pamilya bangod wala sila nakakuha sang autopsy result ni James halin sa Saudi Arabia.
Nagapanawagan sa karun sang hustisya ang pamilya para sa kamatayon ni James kag mahibaluan kun ano ang matuod-tuod nga natabo sa iya.
