BACOLOD CITY — 29 ka mga personnel sang Bureau of Fire Prevention sa Negros Island Region ang gin-promote sa ila ranggo kadungan sang culminating activity sang Fire Prevention Month, kahapon, Marso 31.
Suno kay Fire Senior Supt. Fred Trajeras, acting regional director sang BFP Negros Island Region, ang mga na-promote ang ginalakipan sang non-commissioned officers ukon fire officer 2 tubtub sa senior fire officer 4.
53 tanan ang mga nag-apply agud nga magtaas ang ila ranggo apang ginhatagan sang prayoridad ang mga madugay na sa serbisyo kag kwalipikado.
Ginalauman naman nga mahatagan sang slots ang iban nga dapat nga mapromote sa masunod nga binulan.
Ginkalipay naman ni Trajeras nga lunsay Negrosanon ang napromote kun sa diin gintambungan sang ila pamilya ang donning of ranks kahapon.
Samtang, nagtakop man kahapon ang pagsubmit sang mga applicants sang ila folder agud mangin bag-o nga miyembro sang BFP.
Suno kay Trajeras, 107 ang quota para sa NIR kag magasumpa sa Hulyo 1 ang bag-o nga mga fire officers 1.
