BACOLOD CITY – Daku ang pasalamat sang tatlo ka undersecretaries sang Department of Interior and Local Government (DILG) sa pagkakas ni Presidente Rodrigo Duterte kay Sec. Ismael “Mike” Sueno sa puwesto.
Ini ang ginpahayag ni Interior Undersecretary for Public Safety Jesus V. Hinlo sa interview sang Bombo Radyo Bacolod kasunod sang kumpirmasyon sang Malakanyang nga ginsipa si Sueno sa puwesto bangud sang pagkadula sang “trust and confidence” sang presidente.
Suno kay Hinlo, nakadesisyon na si Presidente Duterte kag bilang abogado, iya ini ginbase sa mabakod nga mga ebidensiya kag indi matuod nga ginbase lamang ini sa kutso-kutso matapos mabaton ang sulat nga ginapabangod nga ila ginpadala sa chief executive.
Dugang pa sang tiglikom, ang pagkakas kay Sueno sa puwesto ang makapamaayo para sa DILG bangud madula ang mga issue nga nagalikop diri kag mahatagan sang tsansa ang ahensiya nga makapadayon sa pagtuman sa katungdanan sini.
Hugot naman nga ginpanginwala ni Hinlo nga may kahilabtanan ini sa sulat nga ginpadala sa talatapan ni Presidente Rodrigo Duterte sa diin nasaad ang mga gin-alegar kurapsyon sang ginkakas nga tiglikom, Ismael “Mike” Sueno.
Suno kay Hinlo nga wala ini sang kahilabtanan sa amo nga sulat kag indi siya ang sa likod sang pagsulat sini.
Aminado si Hinlo nga ginakwestyon sini ang pagpadulong ni Sueno sa Austria agud sa pagnegosyar para sa 76 ka mga firetrucks kag ini nga issue ang napagkit man sa indi pirmado nga sulat nga ginpadala sa presidente.
Apang suno sa iya, may separado siya nga mga ebidensiya angot sa amo nga issue kag ini ang iya igapasa sa talatapan ni Duterte para sa nagakaigo nga imbestigasyon.
Una na nga ginpahayag ni Sueno sa Bombo Radyo Bacolod nga wala sang iregularidad sa amo nga biyahe sa Austria.
Depensa sini, nahuman ang deal sadto pang Aquino Administration apang naatrasar ang pag-deliver sini bangud naabtan sang eleksyon.
