BACOLOD CITY — Ginpasiguro sang Bureau of Fire Protection nga ipatuman sang husto ang nakabutang sa probisyon sang Fire Code of the Philippines sa matag-as nga mga building nga natalana nga patindugon sa ciudad sang Bacolod.
Sa interview sang Bombo Radyo, ginpahayag ni Bacolod City Fire Marshal Fire Chief Inspector Publio Ploteña nga may tatlo ka mga plano sang high-rise buildings ukon condominiums nga ginsumiter sa ila opisina sang nagligad nga bulan sang Disyembre.
Ang amo nga mga building ang nahamtang sa Barangay Mandalagan kag 22 ka panalgan ang pinakamataas.
Ang duha naman ang nagataas sang 15 kag 19 storeys.
Suno kay Ploteña, gilayon nila nga sikyaron ang plano bangud kun may yara sang kulang sa fire safety standards, ipabalik ini sa management agud nga macomply.
Ini ang kinahanglanon sa pag-issue sang Fire Safety Evaluation Clearance nga kinahanglanon naman sa pagkuha sang building permit nagikan sa Office of the Building Official.
