30 ka mga manunudlo sang Rizal Elementary School ang nagapanawagan sang pagpahalin sa Principal IV sang buluthuan nga si Mrs. Christina Gemora bangud sa ginaalegar abuse of authority.
Sa sulat nga gin-address kay Assistant Schools Division Superintendent Reynaldo Gico nga napetsahan Setyembre 5, 2022, ginpalab-ot sang mga manunudlo ang reklamo batok kay Gemora bangud sa ginaalegar abuse of authority kag petisyon para sa iya dismissal.
Antes ini, una na nga nagpadala sang letter of complaints ang mga manunudlo sang Mayo 18, Mayo 30, Hunyo 1 kag Hunyo 10 apang bangud anonymous ang nauna nga mga sulat, posible ini ang rason kun ngaa wala sila nakabaton sang response.
Ang tinutuyo sang petisyon, nga ginpermahan sang 28 ka mga manunudlo amu nga pahalinon si Gemora sa Rizal Elementary School ukon itransfer ini sa iban nga buluthuan kag bangud sa ginaalegar inhuman, unfairness, indifferent, unemotional, prideful, peessimistic, unmindful, discrimination, humiliation kag threat nga ginawi nga pamatasan sa nasambit nga principal.
Sa interview sang Bombo Radyo kay Evelyn Mananquil, 32 ka tuig na nga manunudlo sa Rizal Elementary School, madamo ang nagareklamo batok kay Gemora bangud sa indi maayo nga pagdumala sini, pagpakanubo kag pagpakahuya sa mga manunudlo.
Suno kay Mananquil, apisar nga yara sa flag ceremony ukon sa meeting, ginasinggitan sini ang isa ka manunudlo sa kadam-an.
Sang Agosto 30, ginpadal-an ini sang memorandum sang principal kag gin-abisuhan nga maghandle sang teacher-advisership sa Grade 4 apisar nga Grade 5 ang iya ginatudluan kag Home Economics ang iya major.
Suno diri, halin sang nagpungko si Gemora bilang principal sang 2020, wala gid ini nakaagi patawag sa ila kun ano ang ila sala ukon ang indi nila dapat paghimuon kag nagapadala na lamang sang memo.
Bangud diri, siya ang nagalikaw na kay Gemora.
Sang tinalikdan nga Teacher’s Day suno sa iya, ginpatawag ini ni Gemora agud magsaka sa stage kun sa diin yara man si Assistant Schools Division Superintendent Reynaldo Gico kag ginhambalan nga “ari si sir Gico, maexit na ko” bangud sa ila ginapadala nga mga complaints sa opisina ni Gico.
Masami man sini nga ginahambalan ang mga manunudlo nga magpili kun memo ukon abogado, madamo ini sang koneksyon kag madamo na sang manunudlo nga napahalin.
Suno kay Mananquil, wala nagustuhan sang mga manunudlo ang pagtratar sa ila sang principal nga pagpakanubo, pagpakahuya gani sila ang nagpadala sang petisyon agud ini ang mahimuan sang tikang.
