Ginpahayag sang health ministry sa Gaza nga 30 ka mga persona ang nagkalamatay sa isa ka Israeli strike sa isa ka buluthuan sang Sabado samtang 12 naman ka mga kabataan ang nadulaan sang kabuhi sa Israeli-annexed Golan Heights matapos ginhabuyan sang rocket nagikan sa Lebanon.
Suno sa militar sang Israel, nagpalupok sang rocket ang Hezbollah nagikan sa Lebanon kag nag-igo sa isa ka football pitch sa Druze, Majdal Shams kag nagpatay sa mga pamatan-on nga naga-edad sang napulo tubtob 20 ka tuig.
18 ka iban pa nga mga pamatan-on ang napilasan sa nasambit nga pagpang-atake.
Suno kay Prime Minister Benjamin Netanyahu, indi pagpahanugutan sang Israel nga indi mapasabat ang Hezbollah sa makamamatay nga pagpang-atake kag nagpromisa ini nga pabayaron sini sang dako ang militante nga grupo sa insidente.
Humalin sang Oktubre, makapila ka beses na nga nagbayluhanay sang mga pagpang-atake ang Israeli forces kag Hezbollah sa cross-border matapos ang pagpang-atake sang kaalyado sang Lebanese group nga Hamas sa Israel nga gintunaan sang gyera sa Gaza.
Nagpanawagan naman ang United Nations sang “maximum restraint” bangud ang pagpasanyog pa sang pagbayluhanay sang atake ang makapalapad sang konflikto.
