Padayon nga ginabulong sa ospital ang isa ka lalaki nga ginluthang sa Bangga Metal, Barangay Alijis, ciudad sang Bacolod, Domingo sang hapon, June 26.
Ginkilala ang biktima kay Kim Ryan Canillo, 31 anyos, residente sang Barangay Handumanan, syudad sang Bacolod.
Sa interview sang Bombo Radyo Bacolod kay Police Captain Elmer Bonilla, nagalakat lang ang biktima sa lugar samtang nagaestorya sa cellphone sang ginpalapitan sang suspek kag ginluthang.
Naigo sa apipingig ang biktima kun sa diin gilayon man nga gindala sa ospital sang ambulansya sang Barangay Alijis.
Suno kay Bonilla, may nakuha na sila nga CCTV footage kun sa diin makita nga matapos gintiro sang suspek ang biktima, nagpalagyo ini sakay sa motorsiklo nga nagahulat na diri.
Magahulat ang kapulisan sang resulta sang imbestigasyon bangud wala sang slug sang bala sang armas-luthang nga gingamit sa pagtiro sa biktima.
Ginalantaw nga duha ang suspek sa krimen ang isa shooter kag ang isa ang driver sang motorsiklo nga gingamit bilang get away vehicle.
Suno diri mahimo nga ginbantayan ukon ginsundan na ang biktima antes pa man nagluntad ang insidente.
Suno kay Bonilla, ginpadulungan sini ang pamilya sang biktima kag santo sa panaysayon sang amay sang biktima nga may pamahog na sa kabuhi ang biktima apang ginatipon pa nila ang iban nga mga detalye agud nga makahatag sang kompleto nga impormasyon angot sa shooting incident.
Nagapangabay man si Bonilla nga mangin lead ang CCTV footage sa pagsolbar sang kaso kag nagalaom nga matumod sang pamilya ang naghimo sang krimen.
