Ginpatpat sang provincial administrator sang Negros Occidental kun sin-o ang mangin benepesyaryo sang 100,000 doses sang COVID vaccine nga ginprocure sang probinsya para sa 50,000 ka mga persona.
Sa interview sang Bombo Radyo kay Atty. Rayfrando Diaz, ginpahayag sini nga kun mangin available na ng bakuna, ang mangin prayoridad sang probinsya amo ang kapin 3,500 nga mga empleyado kag opisyales sang Provincial Capitol.
Suno kay Diaz, pagahatagan man sang tag 1,000 doses ang tagsa ka mga local government unit kag kun sumahon sa numero sang mga LGU, 31,000 katawo tanan ang mabakunahan.
Ang nabilin nga doses ang para naman sa mga economic frontliners bangud may mga negosyante man nga naghangyo sa probinsya.
Suno diri, ang bakuna para sa 70% sang populasyon sang probinsya ang magahalin naman sa national government.
Nagpahanumdum man ini sa mga pumuluyo nga padayon nga maghalong tubtob nga mangin available na ang bakuna.
