Gin-demolish na ang mga kabalayan sa Brgy. 12 sa ciudad sang Bacolod lakip na ang iya sang punong barangay mismo.
Ginpatigayon ang demolition kaina sang aga sa pagpamuno sang City Legal Office kun sa diin 37 ang ginguba lakip na ang iya ni Punong Barangay JR Alcantara.
Santo sa paathag ni City Legal Officer Reuben Sabig, ang ciudad sang Bacolod ang nagapanag-iya sang duta nga ginatindugan sang nasambit nga mga panimalay kag ginabawi na ini karun.
Magluwas nga ginabawi na sang ciudad ang duta, nagapatigayon man sang paghawan ang city government bangud sang memorandum circular sang Department of the Interior and Local Government (DILG) nga kinahanglan kuhaon ang mga obstructions.
Suno kay Atty. Sabig, nagligad pa nga 2019 ginpahibalo ang mga residente nga magbiya sa lugar apang nahatagan pa sila sang extension tubtob sini nga bulan sang Pebrero.
Ginapasalig naman ni Atty. Sabig nga hatagan sang relocation ang mga maapektuhan nga residente sa relocation site sang ciudad sa Purok Arao, Vista Alegre basta nga makasunod ang mga ini sa mga rekisitos.
Suno naman kay Punong Barangay Alcantara, wala naman sang resistance ang mga residente sa demolition team bangud nahatagan na sila nga daan sang notice nagligad nga 2019.
Sa karun suno kay Alcantara, sarang nga makatiner sa ila barangay hall ang mga residente nga wala pa sang masayluhan bangud may ginpreparar man sila nga mga pagkaon.
Samtang, magatinguha naman si Alcantara nga makakita sang mabakal nga balay sa Brgy. 12 bangud, indi man maayo lantawon nga siya ang punong barangay apang wala siya nagaistar diri.
