Pilason ang 38-anyos nga babayi matapos ginluthang sang riding-in-tandem suspects sa Sitio Malasbalas, Brgy. Orong, Kabankalan City.
Sa interview sang Bombo Radyo kay Police Lt. Jomel Salarda, deputy chief sang Kabankalan City Police Station, nagasakay sa isa ka multicab nga ginamaneho sang iya bayaw nga si Wilson Martinez ang biktima nga si Gennybie Ninial, 38-anyos, residente sang Brgy. Carol-an, Kabankalan City sang sila nga ginpalipitan ni Noel Bromo, 25-anyos, nagamaneho sang motorsiklo kag backrider kag utod sini nga si Mike Bromo, 28-anyos.
Hinali lamang nga ginluthang ni Mike si Ninial sa abaga sang isa ka beses kag nagpalagyo ang motorsiklo.
Gindala sa ospital ang biktima kag sa karun kinahanglan nga operahan ini sa iya abaga.
Natigayon naman nga nadakpan si Noel sa ginpatigayon nga hot pursuit operation sang kapulisan samtang at large si Mike.
Suno kay Salarda, away sa duta ang ginalantaw nga motibo sang krimen bangud may una na nga insidente kun sa diin ginsulod man sang mga ini ang balay sang biktima dala ang binangon bangud sa tensyon sa duta.
Nakaatubangan naman sadto ang duha ka kampo sa barangay apang makaisa lamang ka beses kag wala na ini nasundan.
