39 ka mga persons under monitoring (PUMs) ang natumod sang Provincial Health Office nga naka-close contact kay Patient No. 2 sa banwa sang La Castellana.
Suno kay Dr. Ernell Tumimbang, 18 diri ang nagikan sa Barangay Nato kun sa diin naga-istar ang 43-anyos nga patient no. 2 samtang 21 naman ang narekord sa Barangay Robles.
Gilayon sila nga ginkuhaan sang swab sample agud malantaw kun positibo ang mga ini sa balatian.
Nahibaluan nga sang Lunes, naggwa ang resulta ni Patient No. 2 nga positibo ini sa virus.
Isa ini ka driver sa Pavia, Iloilo kun sa diin ang duha niya ka mga amo ang una na nga nagpositibo sa balatian.
Samtang, wala na sang PUMs nga narekord sa walo ka mga local government units sa probinsya.
Ini ang ginalakipan sang Binalbagan, Candoni, Cauayan, Ilog, Isabela, Valladolid kag Victorias.
Sa karon may yara sang 641 ka mga PUMs sa probinsya.
Apat naman ka mga LGUs ang may yara sang nabilin nga kaso sang persons under investigation (PUIs).
Ini ang ginalakipan sang Calatrava nga may duha ka kaso kag tag-isa sa Cauayan, EB Magalona kag Cadiz.
229 naman ka mga swab sample ang ginpadala sa Western Visayas Medical Center kun sa diin 159 ang nagnegatibo, duha ang nagpositibo kag 68 ang naka-pending pa ang resulta.
Sa pihak nga bahin, ginpahibalo si Bacolod City Mayor Evelio Bing Leonardia kagab-i nga ang 69-anyos nga residente sang Bacolod nga nagtaliwan sa Corazon Locsin Montelibano Memorial Regional Hospital sang Abril 9 ang nagpositibo sa coronavirus disease 2019 (COVID-19).
Ang nasambit nga pasyente ang gin-admit sa CLMMRH bangud nagasuprer ini sang diarrhea.
