3rd Infantry Division sang Philippine Army, suportado si Lt. Gen. Sobejana bilang bag-o nga pinuno sang AFP

Nagpasalig ang tagpamaba sang 3^rd Infantry Division sang Philippine Army nga suportahan nila ang pagpamuno ni Lt. Gen. Cirilito Sobejana nga natalana nga magbulos bilang pinuno sang Armed Forces of the Philippines.

Madumduman nga ginpili ni Presidente Rodrigo Duterte si Sobejana nga magbulos kay AFP Chief of Staff Gen. Gilbert Gapay nga magaretiro sini nga Pebrero 4.

Nahibaluan nga anom ka bulan nga nagpungko si Gapay sa posisyon kag ginbuslan ini siya ni Sobejana bilang pinuni sang Western Mindanao Command.

Natalana man nga pagapamunuan ni Sobejana ang AFP sa sulod sang kapin anom ka bulan ukon tubtob sa Hulyo 31 tubtob nga malab-ot niya ang mandatory retirement age nga 56.

Sa interview sang Bombo Radyo Bacolod kay 3^rd ID spokesperson Army Major Cenon Pancito III, ginpahayag sini nga gina-welcome gid nila ang amo nga development.

Suno sa iya, normal lamang ang pag-ilis sang lider sa ila nga institusyon.

Ginpasalig ni Pancito nga suportado sang 3^rd ID ang palaabuton nga leadership ni Sobejana.

Dugang pa sini nga napamatud-an man sang incoming chief of staff ang iya kaagulingon sa patag-awayan kag bilang isa ka lider.

Nahibaluan nga miyembro si Sobejana sang PMA “Hinirang” Class of 1987 kag nangin recipient sang highest military award nga the Medal of Valor para sa pagpamuno sang tropa sa makamamatay nga engkwento sa masobra isa ka gatos nga Abu Sayyaf fighters sadtong 1995.

Siya ang pinakauna nga Medal of Valor awardee nga mangin AFP chief sa sulod sang masobra pito ka dekada.

Nakabaton man ini sang madamo pa gid nga accolades sa sulod sang masobra 30 ka tuig niya nga serbisyo.

Sang 2019, ginhatagan man ini ni Duterte sang prestihiyoso nga Philippine Legion of Honor para sa iya public service.