BACOLOD CITY – Ginaproseso na ang pagpabalik sa Zamboanga del Norte sang apat ka mga lalaki nga ginkustodiya sang Philippine Coast Guard kag Sipalay City Police Station agud mausisa matapos nagsulod sa ciudad nga wala sang dokyumento.
Sa interview sang Bombo Radyo kay Lt. Senior Grade Jimmy Oliver Vingno, commander sang Coast Guard Station Bacolod, wala sang iligal nga mga bagay nga nakita sa bangka sang mga mangingisda kundi lambat lamang kag iban nga gamit sa pagpangisda.
Sa profiling nga ginpatigayon sang Sipalay City Police Station, ginkilala ang kapitan sang pumpboat nga si Dante Alabata sang Barangay Selinog, Dapitan City, Zamboanga del Norte.
Kaupod sini sanday Vicente Sumalpong kag Joben Tadi-in sang nasambit man nga lugar; kag Jobel Calunod sang Barangay Siparok, Jose Dalman, Zamboanga del Norte.
Suno kay Vingno, Cebuano kag Ilonggo speaking ang mga ini kag magapangisda kuntani sa Oriental Mindoro apang magabakal sang krudo sa Sipalay City.
Suno kay Police C/Insp. Romeo Vargas, hepe sang Sipalay City Police Station, nakig-angot na sila sa Dapitan City Police Station kun sa diin nakumpirmar nga wala man sang malain nga rekord ang mga natungdan.
Bangud sini, magapirma ang mga mangingisda sa deed of undertaking nga magapauli na sa ila ginhalinan kag indi na magpadayon sa pagpangisda sa Oriental Mindoro.
Suno kay Vargas, nakita sang PCG nga manubo sa tatlo ka tonelada ang kabug-aton sang bangka amo gani nga indi sini masarangan ang malawig nga panakayon kag nakumpirmar man nga para lamang sa Zamboanga del Norte ang ila nga permit sa pagpangisda.
