Anom gikan sa 100 nga jeepney driver ang nagpositibo sa ginpatigayon nga random drug test sa Bacolod North Bus Terminal.
Ang Oplan Harabas ang ginpangunahan sang Land Transportation Office – Negros Island Region upod sa Philippine Drug Enforcement Agency – Negros Island Region kag Highway Patrol Group – Negros Island Region.
Sa interview sang Bombo Radyo Bacolod kay LTO-NIR Director Atty Jeck Conlu, ang random drug testing ang ginsuguran alas-8:00 kaina sang aga.
Lakip sa mga ginpaidalom sa drug test ang mga bus driver, konduktor, modernized kag traditional jeepney driver, taxi driver, kag tricycle driver.
Ini agud masegurado ang safety sang mga commuters ilabi na nga ginalauman ang pagdamo sang mga pasahero para sa UNDAS 2025.
Matapos matumod nga positibo, automatic man nga ginkumpiskar kag ginrevoke ang drivers license sang mga drivers.
Ang ila nga urine sample ang ginpadala naman sa Cebu para sa confirmatory testing sang PDEA.
Ang mga salakyan ang ginpakuha naman nila sa operators.
Suno kay Conlu, masami na nga ginabuhat ang random drug testing sa Iloilo gani naanad na ang mga public utility drivers, apang ini ang karun lamang napatigayon sa Bacolod City.
Sa karun, 100 pa lamang ang napaidalom sa drug testing, apang sila ang may mga kasunod pa nga aktibidad apang wala na sini ginbuyagyag kun sa diin kag kun san-o.
