Padayun ang pagpangita sang kapulisan sa apat ka suspect sa pagpangluthang sa duha ka persona sa Prk. Kabuhi, Brgy 10, Bacolod City kagab-i.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, estable na ang kondisyon sang duha ka biktima, apang padayun pa nga ginabulong sa ospital.
May mga impormasyon nga ang duha ka biktima ang residente sang Cadiz City, apang ini ang subject for confirmation pa.
Ang gunman ang ginkilala nga si Alyas Macoy, single, legal ang edad, residente sang Prk Kasing-Kasing, Brgy 10.
Samtang nakita man sa narecover nga CCTV footage nga ginpulihan pa ang mga biktima antes gintiro ni Macoy.
Lakip sa nagbulig sa pagkastigo si Alyas Moy, single, legal ang edad, residente sang Prk Masinadyahon, Brgy 12; kasubong man sanday Alyas Rey, minor, residente sang Prk Kabuhi, Brgy 10; kag sanday Alyas Roy nga nakita nga naghaboy sang botelya kag nag-atake sa mga biktima gamit sang buka nga botelya.
Gilayon nga nagpatigayon sang hot pursuit operation ang mga kapulisan apang wala na malagas ang mga suspect.
Ang naghatag sang impormasyon tuhoy sa identity sang mga suspect amo ang isa pa ka gintudlo nga may kaangtanan, apang nakita sa CCTV footage nga apisar ini ang yara sa area sang natabo ang krimen, ini ang naganago lamang.
Pahayag ni Tolentino nga nanago pa ang informant, bangod siya ang isa sa ginpasibangdan sa krimen, apang sa bulig sang iya mga himata ini ang nagkooperar sa kapulisan.
May-ara naman sang motibo nga ginatutukan ang kapulisan lakip na ang anggulo tuhoy sa illegal nga droga.
Ginalantaw sini ang posibilidad nga nagbakal sang illegal nga droga ang duha ka pangayaw, apang sila ang ginhatagan sang labada, tubtob nga nagresulta sa pagkomprontahanay.
May narecover man nga kutsilyo sa crime scene, apang ginatumod pa kun ini ang ginapanag-iyahan sang mga suspetsado ukon iya sang mga biktima.
Suno kay Tolentino, ginatumod pa ang armas nga gingamit, apang sa basiyo sang bala nga ila narecover, ini ang mahimo nga cal. 45 pistol.
