BACOLOD CITY – Apat ang patay samtang duha ang pilason matapos makabunggo ang kotse nga ginasakyan sang mga magkasimaryo nga padulong kuntani sa albularyo sa Manapla, Negros Occidental, Biyernes sang kaagahon.
Kaagahaon pa lang sang nagbiya sa banwa sang Isabela agud magpabulong sa Cadiz City sanday Anabelle Estil, Rolinda Barte, Angeles Salmorin, Delia Abana, Dolores Granada kag driver nga si Froilan Samillano sang Barangay 1, Isabela.
Pag-abot sang mga ini sa Hacienda Fidel, Brgy. Tortosa, Manapla alas 2:45 sang kaagahon, nakabunggo ang kotse sa nagapundo nga motorsiklo sa higad sang dalan kun sa diin nagapungko si Jeljuredi alias Pao-Pao Labrador, 15 anyos, kag residente sang amo nga lugar,
Gin-arado pa sang kotse ang motorsiklo kalakip ang menor de edad antes ini nagbunggo sa gate sang isa ka balay.
Sa interview sang Bombo Radyo kay Police Captain Jaynick Bermudez, hepe sang Manapla Municipal Police Station, gilayon nga gindala sa ospital ang mga biktima apang napatay ang 80-anyos nga si Salmorin, kaupod sanday Abana, Granada kag Labrador.
Ginabulong pa subong sa ospital sanday Estil kag Barte.
Samtang gasgas naman sa lawas ang gin-agom sang driver nga priso subong sa Manapla Municipal Police Station kag indi pa maistorya bangud sa trauma.
Sa inisyal nga pag-usisa sang mga pulis, napiyongan ang driver.
Suno kay Samillano, gingasolinahan sang lima ang iya nga kotse agud idul-ong ang mga ini sa faith healer sa Cadiz City kag ini ang ila 3rd session agud mag-ayo sa ila balatian.
