BACOLOD CITY — Pila ka mga unibersidad nga may nagkalain-lain nga campuses sa bilog nga isla sang Negros ang makabenepisyo sa Universal Access to Quality Tertiary Education Act nga magalibre sa tuition fees sang mga estudyante sa 112 ka state universities and colleges ukon SUCs sa bilog nga pungsod.
Biyernes sang aga, gin-anunsyar ni Senior Deputy Executive Secretary Menardo Guevarra nga ginpirmahan na ni Presidente Rodrigo Duterte ang layi sang Huwebes sang gab-i, kasunod sang iya pagpakigsapol sa mga mamalidha kag economic managers sa Malacañang.
Bangud sini, mangin libre na ang tuition fees sang mga estudyante sa 112 tanan ka SUCs sa bilog nga Pilipinas kalakip na sa Negros Island Region.
Ini ang ginalakipan sang mga masunod:
1. Carlos Hilado Memorial State College,
2. Central Philippines State University,
3. Northern Negros State College of Science and Technology; kag
4. Negros Oriental State University.
Magluwas diri, sakop man sini ang satellite campuses sang iban nga SUCs kalakip na ang:
1. Philippine Normal University sa Cadiz City; kag
2. Technological University of the Philippines – Talisay City kag Sagay City Campuses.
Nahibaluan nga unexpected ukon wala ginalauman ang approval ni Duterte sa layi bangud nagapamatok ang iya mga economic managers sa amo nga hagna bangud suno sa ila, wala sang bastante nga pondo nga makasustenir sa libre nga tuition fees.
May kaangtanan sini, ginakabig sang presidente sang Central Philippines State University nga kadalag-an sang pigado nga mga estudyante nga nagahandom mag-eskwela ang pagpirma ni Duterte sa Universal Access to Quality Tertiary Education Act nga magalibre sa tuition fees sa 112 ka state universities and colleges ukon SUCs.
Sa exclusive interview sang Bombo Radyo kay CPSU President Dr. Freddie Maningo, ginpahayag sini nga ginalauman na ang pagdamo sang mga estudyante nagikan sa pigado nga mga pamilya nga maga-eskwela sa SUCs kasunod sang layi.
Ini bangud pamasahe nalang ang problemahon sang mga ginikanan kag allowance sang kabataan.
Nagpasalamat si Maningo sa mga senador kag kongresista nga nagtinguha nga mabalay kag mapasar ang amo nga hagna.
Subong nga semester, libre na ang tuition fees sang indi magnubo 10 mil ka mga estudyante sa tanan nga campuses sang CPSU sa diin ginpainan sila sang 42 milyones pesos nga pondo.
Bangud layi na ang free tuition, mangin tayuyon na ini sa masunod nga semester.
Sa pihak sini, ginpasiguro naman sang CPSU president nga magahimo ang Commission on Higher Education ukon CHED sang pagsulundan agud indi mauyang ang kwarta sang gobyerno sa pagpaeskwela sa mga estudyante.
