Patay ang 40 anyos nga lalaki matapos ginluthang pasado alas-2:00 kaina sang kaagahon sa Kalantas Street, Zone 3 , Abada Escay, Brgy Vista Alegre, Bacolod City.
Ang biktima ang ginkilala nga si Rolly Raquel, 48 anyos residente sang Prk Arao, Brgy Vista Alegre.
Sa interview sang Bombo Radyo Bacolod kay Mary Jane Españosa, kapin walo ka adlaw lamang naga-arkila sa lugar ang biktima.
Suno diri, kapin anom ka sunod-sunod nga lupok sang armas-luthang ang ila nga nabatian kag ang natumba nga motorsiklo lamang ang una nila nga nakita.
Gintsekyar ini sang ila mga kaupod kag didto nasapwan ang duguon na nga biktima.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 7, ang biktima ang nagabisita lamang sa balay sang iya anay live-in partner bangod sila ang may duha ka kabataan.
Sa karun padayun ang ila imbestigasyon sa kaso.
Isa sa ginatutukan sang mga ini nga lead ang anay kaso sang biktima nga frustrated murder nga naserbihan naman sini sang anom ka tuig nga pagkapriso sa Muntinlupa.
Si Raquel ang nakagwa sa prisuhan sang 2020.
Magluwas diri, may iban pa sila nga angulo nga ginalantaw.
Ang biktima ang may pila ka igo sang bala, kag ginatumod pa kun sa atubang ukon sa likod ang entrance sang gunshot wounds.
Nakarecover man sang duha ka empty shells sang caliber .9mm kag isa ka deformed slug sa crime scene.
Suno kay Santillan, wala sang nakatuad nga witness gani indi maseguro kun pila ang suspect, apang sa pagbanta sini yara lamang sa isa ukon duha ang may kahimuan sang pagpatay.
