2 ka menor de edad, ginbuno sa banwa sang Cauayan, isa patay; rasun sang suspect, “tripping” lamang

Nadakpan na ang suspek nga nagbuno sa duha ka menor de edad kun sa diin ang isa ang napatay samtang ang isa ang padayon nga ginabulong sa Prk. 4, Brgy. Guiljungan, Cauayan, Negros Occidental sang Abril 12, 2026.

Sa interview sang Bombo Radyo Bacolod kay Police Lt Col. Norberto Barniso, hepe sang Cauayan Municipal Police Station, may liga sang basketball sa nasambit nga Barangay kag sang natapos ang pahampang ang mag-abyan ang naghampang man sang basketball agud magpabalhas.

Suno kay Barniso sang nagalakat na pauli ang mag-abyan, ginsundan sila sang suspek kag wala sang madamo nga estorya ginbuno sini ang mga biktima.

Ang isa sa mga biktima ang nakaagom sang pilas sa likod kun sa diin padayon nga ginabulong sa Cauayan District Hospital samtang ang isa ang nakaagom sang pilas sa nawala nga abaga nga nagresulta sa iya kamatayon.

Nadakpan man sang Abril 13 ang suspek kag nakahunong na sa Cauayan Municipal Police Station kasunod sang ginpatigayon nga hot pursuit operation sang mga kapulisan.

Ginpatumod pa ini sa mga witness kag gin-ako man sini ang krimen.

Pahayag sang suspect nga tripping lamang sini nga bun-on ang mga biktima.

Indi man makumpirmar kun ini ang nagagamit sang illegal nga druga bangud wala man ini ginpaidalom sa drug test samtang wala man ini nakainum sang makahulubog nga ilimnon.

Ginpasakaan naman ang suspek sang kaso nga murder kag frustrated murder.