Patay ang isa ka 40-anyos nga lalaki matapos ginbuno sang iya kaupod sa ubra sa Riverside, San Jose, Barangay Salong, Kabankalan City sang Biyernes sang gab-i.
Sa interview sang Bombo Radyo kay Police Lt. Jomel Salarda, Deputy Station Commander sang Kabankalan City Police Station, santo sa pahayag sang suspetsado nga si Alan Pondales, 42 anyos kag residente sang nasambit nga lugar, ginhagad ini siya sang biktima nga si Emmanuel Manos, 40 anyos, nga magtambong sa isa ka birthday sang ila ginaubrahan sa ginatapsan sang tubo kag maga-isip man sang ila nga sweldo apang nagpamalibad si Pondales bangud luyag sini nga magpahuway.
Suno kay Salarda, sa pahayag sang suspetsado, pagkatapos sang birthday, nagsugat-anay ang duha kag bangud nga ginaalegarnaglain ang buot ni Manos bangud wala siya gin-updan, ginhandusan sini si Pondales sang iya dala nga buka nga botelya apang nakalikaw ang suspetsado kag ginbuno sini si Manos sa tiyan.
Gindala pa ini sa balaybululngan kag gintransfer sa isa ka ospital sa Bacolod apang kahapon sang kaagahon, nadulaan na ini sang kabuhi.
Suno sa deputy station commander, santo naman sa ila imbestigasyon, wala sang may nakit-an nga buka nga botelya sa crime scene kag ang kutsilyo lang ang ara didto.
Suno man sa asawa ni sang biktima, may yara sang daan nga hiligut-anon ang duha kag wala sang bitbit nga buka nga botelya ang iya nga bana.
Sa karun nagapadayon pa ang imbestigasyon sang kapulisan sa insidente samtang yara naman sa kustodiya sang Kabankalan City Police Station si Pondales kag natalana nga pasakaan sang nagakaigo nga kaso.
