Pilason ang 41 anyos nga lalaki matapos ginluthang sang wala makit-an nga persona sa Sitio Bonbon Barangay Marcelo, banwa sang Calatrava, Negros Occidental, kahapon, alas- 9:00 sang aga.
Ang biktima ang ginkilala nga si Harnek Balopeños, single, mangunguma kag residente sang nasambit nga banwa.
Sa interview sang Bombo Radyo Bacolod kay Police Major Wilfredo Benoman, hepe sang Calatrava Municipal Police Station, nagapungko sa ugsaran si Balopeños sang may nabatian ini nga lupok kag nakapkapan nga may igo ini sang bala sa nawala nga paa nga naglapos sa iya tuhod.
Suno diri, gilayon gindala sa ospital Balopeños agud mahatagan sang nagakaigo nga pagbulong kag sa karun yara na sa estable nga kondisyon.
Wala naman nakit-an sang biktima kun sin-o ang nagtiro sa iya.
Naga-apelar sa karun ang kapulisan sa kooperasyon sang komunidad para sa dugang nga impormasyon angot sa insidente para sa kalinong kag katawhay sang banwa sang Calatrava.
