Nasapwan ang isa ka lalaki nga wala na sang kabuhi sa katubuhan sa banwa sang Isabela., Negros Occidental, Lunes, Nobyembre 2.
Sa interview sang Bombo Radyo Bacolod kay Police Major Hancel Lumandaz, Chief of Police sang Isabela Municipal Police Station, sang November 1 nag-inum inum ang biktima sang makahulubog nga ilimnon kag ginalantaw nga sang November 2 sang kaagahon na natabo ang krimen kag sang udto sang pareho nga adlaw nasapwan ini.
Ginkilala ang biktima nga si alyas “Chikol,” 43-anyos, residente sang nasambit nga lugar.
Nakaangkon ini sang siyam ka mga buno sa lawas nga ginalakipan sang tag-tatlo sa dughan kag abaga samtang isa sa liog, paa kag ulo.
Suno kay Lumandaz, mahimo nga ginguyod pasulod sa kampo ang biktima matapos nga may nakita nga tinulo sang dugo sa dalan padulong sa lugar kun sa diin ini na nasapwan.
Dugang pa sang hepe nga nakaagom ang biktima sang siyam ka mga pilas sa iya lawas.
May yara sang person of interest ang Isabela Municipal Police Station sa naghimo sang krimen kun sa diin lunsay mga kaupod sini sa pag-inum sang makahulubog nga ilimnon.
Suno kay Lumandaz, mahimo nga may yara sang indi pag-instindihanay sa tunga sang biktima kag ginapahayag nga person of interest antes nagluntad ang insidente sang pagpamuno.
Nagpanawagan man ini sa mga person of interest nga magkooperar sa imbestigasyon sang mga kapulisan agud nga masolbar ang kaso kag mahatagan sang hustisya ang kamatayon sang biktima.
