Patay ang isa ka 44-anyos nga lalaki matapos ginluthang sang indi magnubo sa anum ka mga armado nga persona sa Barangay Manghanoy, La Castellana, Negros Occidental, pasado alas-6:00 sang gab-i sang lunes, Enero 5.
Sa interview sang Bombo Radyo Bacolod kay Police Captain Dennis Melgario, hepe sang La Castellana Municipal Police Station, ang biktima upod ang iya nga pakaisa ang magapadulong kuntani sa ila nga punong sang hinali lang nga naggwa ang grupo sang wala makilalan-an nga mga persona kag hinali nga ginluthang ang biktima sang makapila ka beses.
Gina-alegar nga antes nagpalagyo ang mga suspetsado, naghambal pa ini nga “Dugay ka na namon ginapangita.”
Suno kay Melgario, ang mga suspetsado ang nakasibilyan kag may dala nga mga malagba nga armas.
Gilayon nga gindala sa Rural Health Unit (RHU) ang biktima apang ini ang gindeklarar nga dead on arrival.
Padayon pa ang imbestigasyon sang kapulisan agud matumod ang motibo sa krimen.
Panawagan sini sa mga may impormasyon nga makig-angut sa kapulisan.
