Patay ang 48-anyos nga lalaki matapos nga maligo sa Sinking ukon anay Maricalum Mining sa ciudad sang Sipalay.
Ang insidente nagluntad sa Sinking nga anay Maricalum mining sa Barangay San Jose, ciudad sang Sipalay, sang Sabado.
Ang biktima ang ginkilala nga si Bernie “Bad Boy” Magbanua Moises, 48-anyos, single, wala sang trabaho kag residente sang Purok 3, Barangay 5 sa nasambit nga ciudad.
Sa interview sang Bombo Radyo Bacolod kay Police Lt. Col. Fernando Somblingo, acting chief of police sang Sipalay City Police Station, sang Sabado sang aga bangod sa tuman ka init kag dugang pa nga brownout, nagdesisyon ang pamilya nga maligo sa Sinking.
Apang, sang hapon, nagpauli lamang ang pamilya kag wala nanotisyaran nga indi nila kaupod ang biktima.
Ulihi naman ini nareport nga namissing bangod nga ulihi na nga nahibaluan nga wala ini nakaupod pauli.
Pagkasunod nga adlaw, nasapwan na lamang ang biktima nga naga-utaw utaw kag wala na sang kabuhi.
Suno kay Somblingo, ginbaton naman sang pamilya nga drowning incident ang natabo kag wala sang foul play.
