49th ASEAN Summit and Related Summits, nagtakop na; President Bongbong Marcos, ginpasalamatan ang tanan nga nagtambong
-- ADVERTISEMENT --

Nagpalab-ot sang pagpasalamat si President Ferdinand Marcos Jr. sa publiko kag sa tanan nga nangin kabahin sang madinalag-on nga paghiwat sang 49th ASEAN Summit and Related Summits sa pungsod.

Gindayaw sang presidente ang mga ahensya sang gobyerno, law enforcers, volunteers, media teams, kag iban pa nga mga personnel nga nagbulig agud masiguro ang maayo nga lakat sang pagtilipon.

Ginkilala man sang presidente ang importante nga papel sang kada sektor sa pagpabilin sang kalimpyo, seguridad, kag mainit nga pag-abi-abi sa mga nagbisita nga lider kag delegado naggikan sa nagkalain-lain nga pungsod.

Magluwas sa mga nagtrabaho sa likod sang summit, partikular man nga ginpasalamatan ni Marcos ang mga pumuluyong Pilipino nga naapektohan ang pang-adlaw-adlaw nga gawi kag biyahe bangud sa mga ginpatigayon nga preparasyon kag mga aktibidad.

Ginhatagan sang pagtamod ni Marcos ang ginpakita nga pasensya, paghangop, kag pakigbahin sang publiko sa kabug-usan sang regional conference.

-- ADVERTISEMENT --

Ginpahayag ni Marcos nga ang kadalag-an sang pag-host sang Pilipinas ang resulta sang paghiusa sang gobyerno kag sang mga pumuluyo.