Nagdamo pa gid ang mga kandidata sa Miss Universe nga pailisan sang Negrense international fashion designer subong nga tuig.
Miss US Virgin Islands Miss St. Lucia Miss Iceland Miss Bahamas Miss Mauritius
(c) from web
Sa interview sang Bombo Radyo Bacolod kay Kirsten Regalado sang La Castellana, Negros Occidental apang nakabase na sa karon sa Miami, Florida, USA, lima ka mga kandidata ang nagpadesinyo sang evening gown kag national costume.
(c) Kirsten Regalado page
Ini ang ginalakipan sang Miss Bahamas, Miss Mauritius, Miss US Virgin Islands, Miss Iceland kag Miss Saint Lucia.
Sang tinalikdan nga tuig, kandidata lang sang Mauritius kag Iceland ang ginapabayu-an ni Regalado.
Si Miss Bahamas Tarea Sturrup, Miss St. Lucia Bebiana Mangal kag Miss Mauritius Ornella LaFleche ang nagpahimo sang evening gown samtang disenyuhan naman sang National costume sanday Miss Iceland Birta Abiba, Miss US Virgin Islands Andrea Piecuch, kag Miss Mauritius.
Suno kay Regalado, wala gid siya ang naglaum nga siya ang tawgan sang national director sang Bahamas para magdisenyo sang evening gown para sa ila kandidata.
Sa karun, may yara na siya sang napanumduman nga disenyo para sa mga gowns kag national costume nga iya pagahimu-on.
Sa masunod nga semana, magasugod na ang pila sa mga kandidata sa pagbisita sa studio ni Regalado para sa fitting.
Pagabuligan man si Regalado sang iya Negrense team nga nagabulig sa iya humalin sang nagsugod ini sa pag-angkon sang international clients, kaangay sang iya utod kag hinablos.
Aminado naman ang fashion designer nga excited na ini nga maghimo sang mga gowns kag costume.
Sa December 4, magalupad na si Regalado sa Atlanta, Georgia sa diin hiwaton ang Miss U bangud imbitado ini sa pila ka mga aktibidad antes ang pageant proper.
