Nagdugay sang pila ka oras ang pagpangita sa lima ka tuig nga bata nga babayi nga namissing sa ciudad sang Talisay sang Lunes sang hapon antes ini nakit-an sa ciudad sang Bacolod, Martes sang kaagahon, July 2.
Sa interview sang Bombo Radyo Bacolod kay Ces Prospero, tiya sang biktima, sila ang halos wala makatulog matapos nga madula ang bata nga ginkilala lamang kay Danica, residente sang Purok Water Lily, Brgy. Zone 10, Talisay City.
Suno kay Prospero, tiya ni Danica ang nagasagod sa iya bangud ang iya iloy ang yara sa Manila.
Bangod construction worker ang iya amay, masami sini nga ginabilin ang bata sa iya nga pakaisa sa Purok Water Lily, Brgy. Zone 10, Talisay City, apang may mga tinion nga nagakadto ini sa bisan diin lang nga balay.
Ang bata ang gina-alegar ginhagad sang duha ka bata nga lalaki kapin ala-1:00 sang Lunes sang hapon samtang nagahampang sa karsada kaupod ang iban nga kabataan.
Matapos ginpost sa social media, sila ang nakabaton sang mga impormasyon nga ini ang nakita sa ciudad sang Bacolod.
Ginpasalamatan man sini si Godo Tan, nga natabuan yara sa Barangay Villamonte kun sa diin gina-alegar nakita ang bata, gani ini ang nagbulig man sa pagpangita.
Sa post sa social media ni Tan, makita nga natultulan sini ang bata sa police outpost sa tabok sang entrance sang Capitol Ville, pasado na alas-2:00 sang kaagahon (Martes).
Gilayon nga gindala sa Bacolod Police Station 4 ang mga kabataan samtang ginpaidalum naman sa medical examination si Dannica bangod ini ang nagareklamo nga nagasakit ang iya kinatawo.
