Lunsay negatibo ang resulta sa ginpatigayon nga swab testing sa 50 ka mga personnel sang Negros Occidental Police Provincial Office (NOCPPO) nga nagtambong sa Anti-Drug Summit sa Bacolod santo sa ginpadala nga linear list sa ila.
Suno kay P/Lt. Abegael Donasco, deputy spokesperson sang NOCPPO, ginapasalamat sang mga ini nga nagnegatibo man ang test result ni Provincial Director P/Col. Romy Palgue.
Pahayag sini nga advance notice palang ang linear list nga ginpadala sa ila natuhoy sa pagnegatibo sang test result kag ginahulat nga magaabot ang official result sa masunod nga semana.
50 ka mga police personnel ang ginpaidalum sa 1st batch sang swabtest apang nasundan naman ini sang dugang nga 50 para sa ikaduha nga batch.
Ang 2nd batch ang ginalauman nga magagwa ang resulta subong nga adlaw samtang ang official test result ang igapadala man sa masunod nga semana.
Paathag ni Donasco nga matapos ang swab testing, standard operating procedure (SOP) na sa ila nga magpaidalum sa self quarantine.
Nakabalik naman sa duty ang una nga batch matapos nga mag-abot ang linear list nga nagnegatibo apang ang ikaduha nga batch ang padayun pa nga nagaquarantine.
Padayun naman nga ginatrabaho sang tagsa ka mga Police Station ang pagpangayo sang suporta sa tagsa ka mga local government units (LGUs) nga maghatag sang pondi para sa pagpaswab sang mga kapulisan.
