Nakagwa na sa ospital kahapon ang 52 ka mga mga persona nga na-admit matapos nga ginaalegar nabiktima sang food poisoning bangud sa pagkaon sang lugaw nga may lakot nga root crop nga gindumdom sang mga residente nga ube sa ciudad sang Sagay.
Sa interview sang Bombo Radyo Bacolod kay Dr. Zephard Gerhart Caelian, pinuno sang Provincial Disaster Management Program Division (PDMPD), yara na sa estable nga kondisyon ang 52 ka mga persona nagikan sa tatlo ka mga barangay sa nasambit nga ciudad nga nagkaon sang kayos.
Suno kay Caelian, malapit 80 tanan ka mga persona nagikan sa Barangay Rizal, Poblacion 2 kag General Luna ang naglain ang pamatyag matapos nga magkaon sang nasambit nga root crop nga ginkali sang isa ka persona kag iya ini ginpanghatag sa iya mga himata kag abyan sa pagpati nga ini ang ube.
Nangin tradisyon na kada Biyernes Santo sa ciudad ang paghimo sang lugaw gani ginlakot man sang mga nagluto sang lugaw ang nakuha nga kararuton.
Ginkumpirmar man ni Caelian nga naghatag na ang lokal nga pamunuan sang Sagay sang food packs sa mga nagkalahilo.
