Patay ang 55 anyos nga tricycle driver matapos ginluthang sang tatlo ka wala makilal-an nga mga persona sa sulod mismo sang ila nga balay sa Purok Linya, Barangay Cabug, Bacolod City kagab-i.
Alas 10:00 sang gab-i sang nakabatun sang tawag ang Bacolod Police Station 9 gikan sa isa ka concerned citizen nga may nagluntad nga shooting insident sa nasambit nga lugar.
Nagresponde ang mga katapo sang kapulisan kag naabtan sa iya mismo nga puluy-an nga nagahamyangon na ang lawas sang biktima kag may-igo sang luthang sa nagkalain-lain nga bahin sang iya nga lawas.
Ang biktima ang ginkilala kay Eduardo Cataraja, 55 anyos kag pamilyado.
Nakita sang isa ka witness nga ginsulod sang tatlo ka wala makilal-an nga mga persona nga may bitbit nga mga armas-luthang ang balay sang biktima kag nasundan na ini sang mga lupok.
Nakuha gikan sa crime scene ang walo ka fired cartridges sang cal. 45, isa ka fired cartridge sang cal. 5.56, isa ka android cellphone, isa ka keypad cellphone, isa ka brown nga wallet nga naga-unod sang pila ka mga ID kag cash sa balor nga P1,521, isa ka one dallor Australian coin kag isa ka gray nga sling bag.
Gilayon nga nagpalagyo sa wala mahibaluan nga dereksyon ang tatlo ka mga suspetsado.
