Nagapaayo pa sa ospital ang isa ka iloy nga naigo sang kilat sa sulod mismo sang ila balay sa Barangay Busay, Bago City, Negros Occidental sang tinalikdan nga Abril 11 sang gab-i.
Ang biktima ginkilala kay Isabelita Pateño.
Suno kay Punong Barangay Eddie Roque, nagapanyapon sanday Pateño sang nagtupa ang madamol nga pag-ulan kag naigo sang kilat ang ila balay nga human sa kawayan.
Nag-agom sang sunog sa lawas ang 59-anyos nga iloy samtang wala naman nadalahig ang iban sini nga kaupdanan sa ila balay.
Gindala si Pateño sa Bago City Hospital apang ginsaylo ini sa Corazon Locsin Montelibano Memorial Regional Hospital bangud sa seryoso nga kapilasan.
Suno kay Roque, masami gid man ginakilatan ang lugar sang biktima kag pila ka tuig ang nakaligad, may napatay man nga karbaw diri bangud sa kilat.
