Ginreklamo ang anom ka mga katapo sang 79th Infantry Battalion sang Philippine Army sa Cadiz City Police Station matapos nag-maoy, nag-pangkuga kag nag-pangbunal gamit ang lamesa sa mga customer sa isa ka resto bar sa ciudad sang Cadiz kaina, alas-12:15 sang kaagahon.
Sa impormasyon nga nakuha sang Bombo Radyo Bacolod, ginkilala ang mga gin-detained nga sanday Army Corporal Louie Tamparing, 28-anyos kag residente sang Poblacion Tigbao Zamboanga Del sur, Private First Class John Anthony Jimenez, 24-anyos sang Tapaz Capiz, Private First Class Johnny Gallano, 24-anyos sang Brgy. Lucero Jamindan Capiz, Private First Class Mark Vargas, 25-anyos sang Brgy. Lucero Jamindan Capiz, Private First Class Jerome Danias, 25-anyos sang Cagayan De Oro City kag Private First Class Regie Rogan, 25-anyos sang Libacao, Aklan.
Suno sa report, gin-reklamo sila sa kapulisan nga nag-maoy sa Chiller’s Resto Bar, nga nahamtang sa Gustilo Boulevard Brgy. Zone 2 ciudad sang Cadiz.
Ang mga tag-reklamo ang gin-kilala kanday Jessica Amor Ramirez, 19-anyos kag Jance Dabalos 28-anyos, lunsay residente sang Purok Paradise Saromar Subdivision Brgy. Poblacion 2, Sagay City.
Apat ka mga caliber .45 pistol ang na-recover sang kapulisan gikan sa mga miembro sang Philippine Army.
Samtang, ginpanginwala naman ni Army Capt. Rowell Dairocas, Civil Military Operations Officer sang 79th IB, nga nagamaoy ang anom ka mga suldado.
Suno diri, gin-safekeeping lang sang Cadiz PNP ang nasambit nga mga katapo sang militar bangud nagatunog na ang mga tingog sini sa restobar.
Dugang pa ni Dairocas nga ginturn-over na sa ila paghinakop ang anom.
Sa karon, nagapatigayon sila sang follow-up investigation sa ila nga lebel agud mahibaluan ang matuod nga natabo.
Ginpasiguro naman sang opisyal nga magapangatubang sang punishment ang mga imbolbado nga suldado bangud hugot sila nga ginadumilian nga mag-inom sa pampubliko nga lugar.
