Isa ka 6 ka tuig nga bata nga lalaki ang labing una nga kaso sang napatay bangod sa Pertussis sa ciudad sang Bacolod, apisar nga ini ang kompleto sa bakuna.
Sa interview sang Bombo Radyo Bacolod kay Dr Grace Tan, head sa Environment and Sanitation Division sang Bacolod City Health Office, kumpleto sa bakuna ang anom ka tuig nga bata apang ginalantaw nga madamo sang unvaccinated sa palibot sini gani siya ang nalatnan.
Pahanumdom sini nga ang pinakamataas ang risgo nga malatnan amo ang mga may comorbidities.
Nahibaluan nga caretaker lamang ang nagabantay sang napatay ang bata sang Mayo 26 sa Barangay Villamonte, Bacolod City kag ang iya mga ginikanan ang lunsay yara sa gwa sang pungsod.
Gani panawagan ni Tan sa tanan nga mga caretakers sang mga kabataan kag mga ginikanan nga kun may ginabatyag nga ubo, sip-on kag hilanat ang mga kabataan, mas maayo nga magdangop na sa mga health centers.
Dugang pa sini nga karun nga nagatransition sa tig-ululan, indi lamang pertussis ang balantayan subong man ang pagtaas sang kaso sang dengue.
Pahayag ni Tan nga kun kinahanglan nga i-admit ang bata nga may ginabatyag, indi na dapat nga magduhaduha pa agud indi na magdangat sa ponto nga kita ang magahinulsol.
