Halos pilo ang ginsaka sang presyo sang bombay sa karon kun ikumparar sang bulan sang Hulyo samtang wala naman sang pagbag-o sa presyo sang ahos.
Sa interview sang Bombo Radyo kay Arnel Lubrido, helper sa balaligyaan sang ahos kag bombay sa Libertad Public Market, P80 ang presyo sang kada kilo sang ahos samtang P115 ang kada kilo sang bombay halin sang Agusto.
Suno diri, P1,550 ang presyo sang isa ka net nga 15 kilos, apang sang wala pa nagsulod ang Agusto, P60 lang ang kada kilo sang red onions.
Tuman naman kamahal ang white onions nga nagadangat sa P600 kada kilo apang wala na sang delivery sa karon nagikan sa luwas sang pungsod gani wala man sila sang ginabaligya nga white onions.
Suno kay Lubrido, mahina ang baklanay subong sang red onions bangud mahal ang presyo.
Nagsaka ang presyo suno sa iya bangud off-harvest season sa karon kag malaka nalang ang nagasulod nga supply nagikan sa Pangasinan, Cagayan kag Mindoro kag magabalik naman ang bastante nga supply sa Enero tubtub Pebrero.
Mas barato naman ang ahos bangud imported ini nagikan sa China kag bastante ang supply.
Kun magsulod ang imported nga red onions suno kay Lubrido, maganubo na ang presyo gani kinahanglan nga mapaubos ang daan nga stocks antes mag-abot ang imported agud indi sila mamierdihan.
