Natrauma na ang 73 anyos nga lola sa natabo nga engkwentro sa Brgy Salamanca, Toboso, Negros Occidental sang Domingo.
Sa interview sang Bombo Radyo Bacolod kay Nene Dumilig, residente sang Sitio Plarinding, Brgy Salamanca, nakibot na lamang sila sang nakabati sang lupok sang Domingo kag sa pagtamwa sini sa gwa, didto na niya nakita ang pila ka miyembro sang 79th Infantry Battalion.
Gilayon siya nga gin-abisuhan nga maghapa, samtang ang iya mga kaingod nga yara sa gwa ang ginmanduan man nga maghingagaw sulod sa ila nga balay.
Suno kay Dumilig, ini ang nasundan na sang pagbinayluhanay sang lupok, nga nagdugay gani sila ang nalawigan man nga nagakuob sa sulod sang balay.
Sa 73 ka tuig nga pagtinir sa lugar, karun pa lamang naka-eksperyensya si Dumilig nga may nagluntad nga engkwentro sa ila lamang ugsaran.
Ginapakamaayo na lamang sini nga siya ang ginkuha sang iya umagad, bangod nagaisahanon lang siya sa balay.
Gani tuman ang trauma nga nabatyagan sini, kag indi na sini mahibaluan ang himuon kun masulit pa ang hitabo.
Madumduman nga 19 ang napatay sa nasambit nga engkwentro sa NPA nga ginalakipan sang 14 ka lalaki kag 5 nga babayi.
Kalakip sa napatay si Roger Fabillar, nga mas nakilala bilang si Arnel Tapang, alyas Jhong/Nono/Domeng, 38anyos, ang commanding officer sang Northern Negros Front nga may patong sa ulo nga P1 million.
Sa karun tatlo pa lamang sa mga napatay nga NPA ang nakilal-an nga ginalakipan ni Arnel Tapang, Rowel Sabillo, residente sa Brgy Tabunac, Toboso kag Rene Villarin Sr., residente sang Brgy Marcelo, Calatrava.
