Ginalantaw sang pinuno sang 79th Infantry Battalion sang Philippine Army ang posibilidad nga may yara sang bag-o nga armado nga grupo nga gintukod sa banwa sang Salvador Benedicto, Negros Occidental.
Sa interview sang Bombo Radyo Bacolod kay 79th IB Commander Lt. Col Arnel Calaoagan, sila mismo ang natingala nga may yara sang kaangay nga grupo apang ginapanumdom man sang mga ini nga mahimo nga may yara sang nagaexister nga lain nga armado nga grupo kag gamay ang posibilidad nga ini ang katapo sang remnants sang New Peoples Army.
Suno sa commander sang 79th IB mahimo ang mga ini ang miyembro sang local armed group.
Suno kay Calaoagan, ang bisan sin-o nga grupo nga may dala nga armas nga indi katapo sang Philippine Army kag AFP ang ginakabig nga pamahog sa seguridad sang pungsod.
Nagpasalig man ini sa mga pumuluyo sang banwa sang Salvador Benedicto nga ang mga impormasyon nga ila mabaton ang ila nga ginaverify kag ginpahayag man sang mga ini nga ginaubra nila ang ila katungdanan sa pagpabilin sang kalinong kag katawhay sa sosyodad.
