Padayon nga ginadapatan sang pagbulong ang nasamaran nga persona matapos nga magmaoy kag nanaya sang armas-luthang sa nagresponder nga katapo sang Charlie Company, 62nd Infantry Battalion, Philippine Army sa Barangay Macagahay, Moises Padilla, Negros Occidental sang Marso 23 sang gab-i.
Sa interview sang Bombo Radyo Bacolod kay Police Major Ryan Villasario, hepe sang Moises Padilla Municipal Police Station, nagapabilin sa ospital ang suspetsado kag estable naman ang kondisyon sang suspek.
Suno kay Villasario, nagmaoy ang suspek nga may dala nga patalom kag armas-luthang.
Natabuan man nga ang katapo sang 62nd IB ang nagapatigayon sang Mobile Community Support Sustainment Program kag nagabulig sa mga kapulisan sa pagpatuman sang peace and order.
Nakita sang mga ini si Alyas Rey Ann nga nagamaoy samtang nagauyat sang patalom kag armas-luthang.
Gintinguhaan sang mga ini nga mapakalma ang suspek, apang sa baylo nga magkalma gintayaan sini sang iya pusil ang nagresponde nga otoridad, rason nga siya ang ginluthang ni Private First Class Junvy Gardose.
Si Rey-Ann ang naigo sa natuo nga paa, nga natigayon nga makontrolar.
Ginturn-over sang mga personnel sang 62nd IB sa responding unit sang istasyon ang bladed weapon kag pusil sang suspek.
Gilayon naman nga gindala sa Municipal Health Infirmary sang Moises Padilla para sa medical treatment kag sang ulihi ginsaylo sa Kabankalan City Hospital.
