Ginkumpirmar sang Deputy Public Information Officer sang Negros Occidental Police Provincial Office (NOCPPO) nga nagnubo ang mga insidente sang 8 focused crimes sa Negros Occidental sang tinalikdan nga tuig kun ikumparar sa tuig 2019.
Sa interview sang Bombo Radyo kay Police Lt. Abegael Donasco, ginpahayag sini nga humalin sa 202 ka mga kaso sang murder nga nagluntad sang 2019, yara na lang ini sa 176 sang 2020.
Nagnubo man ang mga insidente may kaangtanan sa homicide bangud nagikan sa 58, nagdangat na lang sa 48.
Sang 2019, may 158 ka mga kaso sang physical injuries apang yara na lang ini sa 106 sang nagligad nga tuig.
Nagnubo man sa 154 ka mga kaso sang rape ang narekord sang 2020 humalin sa 154 sang 2019.
Humalin sa 102 ka mga insidente sang robbery, yara na lang ini sa 53 samtang sa theft, nagikan sa 156, yara na lang sa 70 ka mga insidente.
Wala naman sang may narekord nga kaso sang carnapping sang nagligad nga tuig humalin sa duha ka mga kaso sang 2019 samtang nagnubo sa 15 ang kaso sang motornapping humalin sa 2.
Sang 2019, may yara sang 229 ka mga shooting incidents nga nagluntad sa probinsya apang sang 2020, yara na lang ini sa 224.
Nagsaka naman ang mga insidente sang hacking kag stabbing bangud humalin sa 61 kag 75 ka mga insidente, nagdangat ini sa 86 kag 90.
Nakapatigayon ang NOCPPO sang 719 ka mga drug related operations sang 2019 apang sang 2020, 656 na lang ang ila natigayon.
957 ka mga persona ang naaresto sang 2019 samtang sang 2020, 656 ka mga persona ang ila naapprehend.
P28,850,048 ang kabug-usan nga balor sang illegal nga druga ang nakumpiskar sang 2019 apang sang nagligad nga tuig, nagdangat na lang ini sa P27,400,701.
Nagnubo man suno kay Donasco ang firecracker related incidents kun sa diin humalin sa 29, nagdangat na lang ini sa lima.
Suno sa Deputy PIO, dako nga factor ang COVID-19 pandemic sa pagnubo sang crime rate sa probinsya sang tinalikdan nga tuig.
