BACOLOD CITY — Ginapabugal sang iya pamilya sa ciudad sang Bacolod ang nakuha nga rekord sang marathoner nga si Rolando “Junjun” Espina Jr. sa 24-hour World Championships sa Belfast, Northern Ireland.
Ini matapos nga nakuha sang 43-anyos nga si Espina ang bag-o nga national record sa 24-hour endurance run matapos nakadalagan sang 210.79 kilometros humalin Hulyo 1 tubtub 2.
Naguba ni Espina nga isa ka nurse sa Dublin, Ireland ang anay rekord sang isa ka marathoner nga nakadalagan sang 203.4 kilometros sa sulod sang 24 oras.
Sa exclusive interview sang Bombo Radyo sa utod sini nga si Ma. Esther ‘Mate’ Espina, ginpahayag sini nga nakahiligan ni Rolando ang pagdalagan humalin sang ini ang nagtambok matapos nag-untat sa pag-basketball bangud sa injury.
Sa 24-hour endurance run, may yara man sang pundo-pundo suno kay Miss Espina, apang ang pinaka-importante ang kalawigon sang distansya nga madalaganan.
Sang nakaligad nga tuig, nakuha ni Espina ang rekord bilang labing una nga Pilipino nga nakatapos sa Spartathlon sa Greece nga ginakabig ‘toughest ultramarathon in the world’.
Sa masunod nga bulan, magapauli si Rolando agud hingyuon ang suporta sang mga Pinoy bilang tiglawas sang Pilipinas sa Spartathlon race sa bulan sang Setyembre.
Ang nasambit nga nurse ang pang-napulo sa onse ka mag-ulutod nga naga-istar sa Bacolod City, Negros Occidental.
