BACOLOD CITY — Tuman ang pasalamat ni Hinigaran Mayor Jose Nadie Arceo kay PNP Chief Police Director General Ronald ‘Bato’ dela Rosa sa pagka-relieve ni Police Senior Inspector Lawrence Gerald Bathan bilang hepe sang Hinigaran Municipal Police Station.
Sa interview sang Bombo Radyo, ginpahayag ni Arceo nga personal sini nga naistorya si dela Rosa sang siya ang nagpadulong sa Metro Manila sang tinalikdan nga adlaw.
Mismo sa atubang sang alkalde, nagtawag si dela Rosa kay Negros Occidental Police Provincial Office director Police Senior Inspector Rodolfo Castil Jr. nga islan ang hepe sang amo nga banwa sa mas madali nga panahon ukon ASAP.
Nahibaluan nga sa una nga sulat ni Arceo kay Castil, ginahingyo sini nga islan si Bathan kag ibutang si Police Chief Inspector Jake Barila.
Ini bangud sa tensyon nga nagapatunga sa alkalde kag kay Bathan kasunod sang indi pagkonsulta sang anay hepe kay Arceo antes ginkakas sa listahan sang mga drug personalities ang ginapahayag drug lord nga si Jessie Ramos.
Kasunod sang pagpakigsapol sini kay dela Rosa, tuman ang pasalamat sang chief executive nga ginpaboran ang iya hingyo.
Sa karun, wala pa nakareport sa Hinigaran si Barila apang sa tion nga ini ang mag-abot, magapakigsapol sa iya ang alkalde.
