BACOLOD CITY — Mahimo na nga makapatigayon sang kidney transplantation ang Corazon Locsin Montelibano Memorial Regional Hospital.
Ini suno kay Dr. Julius Drilon, ang medical center chief sang CLMMRH.
Nagligad pa nga Biyernes nagbukas ang regional hospital para sa nasambit nga operasyon.
Nahibaluan nga nangin madinalag-on ang pinakauna nga kidney transplant operation sa regional hospital kun sa diin ang recipient ang nagaedad sang 39-anyos kag 42-anyos naman ang kidney donor.
Sa karun, ginahikutar sang ospital ang Package Z sang PhilHealth agud nga mabuhinan ang balayran sang pasyente kun sa diin ang masobra isa ka milyon ka pesos nga gasto sa operasyon ang matunga na lang kun may yara sang nasambit nga package.
Nahibaluan nga diri sa Bacolod lang, may yara sang isa ka libo ka pumuluyo nga nagapa-dialysis kag sa bug-os nga Pilipinas may yara sang kwatro mil nga nagakinahanglan sang kidney transplant apang 1,600 pa lang ang natigayon.
Kasunod sini suno kay Dr. Drilon, sa masunod nga tatlo tubtob apat katuig posible nga makapatigayon naman sang cardiovascular operations sa regional hospital.
